Ný þjónustustefna Strætó bs.
Stefna og framtíðarsýn fyrir Strætó bs. mótuð og hlutverk endurskilgreint
Stjórn Strætó bs. samþykkti á fundi sínum í dag nýja þjónustustefnu byggðasamlagsins sem er hluti af heildarstefnumótun fyrir félagið. Þetta er í fyrsta sinn frá stofnun Strætó bs. sem mótuð er sameiginleg stefna sveitarfélaganna um strætósamgöngur. Þjónustustefnan er svohljóðandi:
Undanfarna mánuði hefur verið unnið að mótun stefnu og framtíðarsýnar fyrir Strætó bs., sem og að endurskilgreina hlutverk þess sem þjónustufyrirtækis.
Stefnumótun okkar er, eðli máls samkvæmt, undir miklum áhrifum af þeim efnahagslegu þrengingum sem við búum við um þessar mundir. Fjármunir eru af skornum skammti og sterk tilhneiging ríkir til að fara vel með almannafé og ráðstöfun þess en um leið leitast við að veita góða og styrka þjónustu.
Stefnumótun Strætó bs
Yfirmarkmið Strætó bs. er að strætósamgöngur á höfuðborgarsvæðinu verði góður og öruggur kostur í samanburði við aðra ferðamáta og stuðli að því að draga úr aukningu bílaumferðar og þeim vandamálum sem því fylgir.
Hlutverk, framtíðarsýn og þjónustustefna
Hlutverk
Starfssvið Strætó bs er á sviði strætósamgangna, þ.e. leiðakerfi sem hannað er til að flytja mikinn fjölda farþega, þegar slíkur fjöldi er á ferðinni. Við höfum því skilgreint hlutverk okkar og starfssvið þannig að:
Hlutverk Strætó er að veita hagkvæmar strætósamgöngur til þeirra sem þurfa á slíkri þjónustu að halda á starfssvæðinu.
Framtíðarsýn
1. Í árslok 2014 verðum við þekkt sem fyrirmyndar-fyrirtæki á sviði umhverfisvænna og skilvirkra strætósamgangna .
2. Þjónustan verði framúrskarandi og svari þörfum mikilvægustu markhópa okkar.
3. Leiðakerfið verði skilvirkt og hagkvæmt.
4. Starfsfólk er ánægt og stolt af sínum störfum
5. Ímynd fyrirtækisins einkennist af virðingu, þjónustulund og vingjarnlegu viðmóti gagnvart notendum.
6. Nýting fjármagns sem bundið er í rekstrinum er með því besta sem þekkist og eigendur okkar eru ánægðir með það samfélagslega virði sem þjónusta okkar skapar.
Þjónustustefna
Í þeirri viðleitni að uppfylla framtíðarsýn höfum við skilgreint ítarlega þjónustustefnu sem okkar meginstefnu. Þjónustustefnan grundvallast á eftirfarandi þjónustumarkmiðum:
1. Leiðarkerfið sé auðskilið og taki mið af almennum ferðaþörfum.
2. Þjónustutíðni
a. Lögð verði áhersla á þjónustu á annatíma og hún efld eftir þörfum. Stofnleiðir og aðrar helstu leiðir aki að minnsta kosti á fimmtán mínútna tíðni.
b. Þjónustutíðni utan annatími sé með þeim hætti að leiðir sem falla í akstursflokka A og B (sbr. töflu 1 í viðauka) aki á fimmtán mínútna fresti, en íbúum sé þess þó almennt kostur að ferðast til og frá sínu hverfi með að minnsta kosti þrjátíu mínútna tíðni.
c. Á öðrum tímum þ.e. kvöld, laugardaga og helgidaga sé þjónustunni hagað með þeim hætti að hún sé löguð að eftirspurn og haldið innan eðlilegra kostnaðarmarka á hverja ferð. Á leiðum í akstursflokkum A og B og öðrum mest notuðu leiðunum sé tíðni að minnsta kosti 30 mínútur. Á öðrum leiðum geti tíðnin verið breytileg og í samræmi við notkun. Tíðni geti jafnvel þróast niður í svokallað „flex-tour“ kerfi þar sem bíll kemur einungis eftir pöntunum.
d. Stefnt sé að því að lækka meðalkostnað hverrar ferðar í kerfinu í heild.
3. Akstursleiðir
a. Þjónusta geti breyst og akstursleiðir hreyfst milli akstursflokka eftir því sem notkun breytist og fjölgun eða fækkun farþega verði á ákveðnum akstursleiðum (sbr. töflu 1 í viðauka). Til grundvallar verði hafðar nákvæmar talningar sem framkvæmdar eru reglubundið ásamt kostnaðarmati.
b. Byggðarsamlagið getur tekið sameiginlega ákvörðun um nýjar akstursleiðir innan byggðasamlagsins.
c. Hvert sveitarfélag getur tekið ákvörðun um nýjar akstursleiðir innan sveitarfélagsins með samþykki stjórnar, enda samræmist sá akstur tímatöflum kerfisins í heild og sé sniðinn að því. Sveitarfélagið standi sjálft straum af kostnaði vegna þess til að byrja með. Þegar ný leið hefur fest sig í sessi og sýnt hefur verið fram á að þörf sé fyrir viðkomandi leið innan kerfisins þá falli hún inn í byggðarsamlagið eins og aðrar akstursleiðir, að fengnu samþykki stjórnar.
4. Leiðarkerfisbreytingar
a. Allar breytingar á leiðakerfi og/eða akstri einstakra leiða á milli tímabila, skal framkvæma í samræmi við gildandi verklagsreglur stjórnar Strætó bs. um leiðakerfisbreytingar.
b. Skv. verklagsreglum skal leitast skal við að haga gerð akstursáætlana á hverjum tíma með þeim hætti að þær taki ekki breytingum á miðju fjárhagsári.
5. Áhersla verði lögð á áreiðanleika, stundvísi og þægindi og eftirtalin markmið sett:
• 95% ferða séu innan 3ja mínútna frá áætlun
• Vagninn sé aldrei á undan áætlun
6. Markmiðið sé að hlutfall þeirra sem nota strætó reglulega verði aukið innan næstu 5 ára. Stefnt er að því að mæla reglulega hlutfallslega notkun á strætóþjónustu meðal íbúa höfuðborgarsvæðisins.
7. Stefnt verði að því að veita upplýsingar um leiðakerfið fyrst og fremst rafrænt og um síma. Áfram verði þó prentaðar upplýsingar en dregið úr þeim eins og kostur er.
8. Unnið verði að því að strætisvagnar fái aukinn forgang í umferðinni og þeir losaðir eftir megni við almennar ferðatafir með það að markmiði að stytta meðalferðatíma.
9. Lögð verði aukin áhersla á innkaup og notkun umhverfisvænni vagna og nýtingu á umverfisvænum og innlendum orkugjöfum á borð við metan og raforku.
10. Gerðar verði auknar kröfur til gæða og útbúnaðar í vögnum til að auka vægi þæginda og öryggis.
11. Aukin áhersla verði lögð á markaðs og kynningarmál.
a. Stefna Strætó bs er að framkvæmd og skipulag þjónustunnar einkennist af þekkingu á þörfum viðskiptavina og jafnvægi framboðs og eftirspurnar.
b. Ímynd fyrirtækisins einkennist af virðingu, þjónustulund og vingjarnlegu viðmóti gagnvart notendum.
c. Leitast verði við að kynna almenningssamgöngur sérstaklega í efri bekkjum grunnskóla á höfuðborgarsvæðinu og hvetja til aukinnar notkunar.
d. Átak verði gert í jákvæðum kynningum t.d. með greinaskrifum, auglýsingum og tilboðum eftir því sem eiginfjárstaða fyrirtækisins eflist.