Norðurlandameistarar!
Keppnislið Strætó bs. vann titilinn annað árið í röð
Ár hvert reyna strætisvagnabílstjórar á Norðurlöndum með sér í ökuleikni á atvinnutækjum sínum. Að þessu sinni fór keppnin fram í Svíþjóð, og var haldin þ. 9. ágúst s.l. Lið Strætó bs., sem vann Norðurlandameistaratitill í fyrra, átti því titil að verja. Keppnisliðið var það sama í ár og í fyrra, en það var eigi að síður valið að undangenginni forkeppni hér heima fyrr í sumar.
Leikar fóru svo að liðinu tókst að verja titilinn, með því að sigra keppnina annað árið í röð. Finnska keppnisliðið gerði harða hríð að liði Strætó bs., svo keppnin var geysi hörð og spennandi. Reynsluboltarnir í liði Strætó bs. höfðu að lokum betur, og unnu sannfærandi sigur.
Í keppni einstaklinga náði Þórarinn Söebech bestum árangri íslensku keppendanna, en hann hafnaði í þriðja sæti.
Við hjá Strætó bs. erum stoltir af okkar mönnum og árangri þeirra, og óskum þeim innilega til hamingju með árangurinn. Þeir eru fyrirtæki sínu til sóma!